अम्मा तमै सलाम

आज चौधरी घना सीरियस दीखा, मन पूच्या, ' के हाल बणा रख्या सै, कछु लेता कोन्या? चेहरे का सेन्सेक्स गेर रखा सै? '
' यार भारती! नू बता, यू ' मदर्स डे ' क्या है?
मन्ने के बेरा। लाइफ में कदी मदर्स डे आया ही न।
के मतलब? तू नहीं मनाता मदर्स डे?
रिश्ते कदी रस्मों के मोहताज नहीं होते। सबै रस्म रिश्तों की मोहताज होवे सूं।

मन्ने भी कदी न मनाया मदर्स डे। काह मनाऊं, मदर तो सांस में बैठी सै हर वक्त याद रहवे मोय।
तू भी न मणाबे अर मैं भी कोन्या। फेर या मदर्स डे कूण मनावे सै?
मदर्स डे यंगिस्तान वाड़ों की देन सै। उनके जीवन अर जनरल नॉलेज में तमाम किस्म के डे होवे सूं, मसलन फ्रेंडशिप डे, हाफ डे, वैलेंटाइन डे, मैरिज डे, एनीवर्सरी डे, बर्थ डे। इन्हीं में से एक दिन मदर्स डे का भी लिकाड़ लेवे, ले बुढि़या। आज तू भी मौज कर ले। तीन सौ चौसंठ दिन के बाद एक दिन थारा भी। उफ कितनी गर्मी सै कमरे में।

मैं तो सर फाड़ दूं ऐसी औलादन कौ।
माडर्न एजूकेशन ले कर यंगिस्तान ने घणी तरक्की करी। इंसान आगे लिकड़ गया, संस्कार अर तहजीब पीछे छूटगी। पहले घर में बुजुर्ग का होना शान की बात थी। इब यंगिस्तान में बुजुर्ग की जगह बुलडाग ने ले ली। मदर्स डे कू ये औलादें अपणा फेमिली एलबम खोलकर मां बाप कौ फोटो देखें सूं कूण सै या बूढ़ी औरत! माई मदर्स? ओह नो।

मदर्स डे मनाने कौ काह जरूरत? किस कू दिखाना चाह?
सोसायटी कू। हाय! डार्लिन्ग। आज मदर्स डे सै। तैयार हो जाओ विधवा आश्रम चलना सै। पड़ोस वाड़े सुबह ही लिकड़ गे। इस बार मम्मी का फोटो खींच लेंगे, फिर मदर्स डे कू उतै जाने की कित्ती जरूरत न।
मां ने पैदा करके जुर्म करी के?
हम्बे! जैसी करनी वैसी भरनी। शादी कौ बाद सिर्फ बीबी ही याद रह जा। मां तो साड़ में मदर्स डे पर ही एलबम ते लिकड़ी जा, ले भाई, आज मदर्स डे पर तू भी धन्न हो जा। तू गाम में पड़ी सड़ री, ट्रेन पकडकर मेरे धौरे आ जा। स्टोर रूम खाली करा दूंगा।

यंगिस्तान में कुत्तों का घणा महल सै। उनका बर्थ डे भी मनाया जा, पर मदर कोन्या। पर भारती! म्हारी हिंदी फिल्मन ने के करी? हीरो कौ गरीब मदर कू मन्ने हर फिल्म में खांसते देखा। जाने कूण सी खांसी सै ठीक न हो री। पर बेहया हीरो कू देख। बड़ा होकर खांसी कौ दवा लाने की जगह हीरोइन के गैल लैला मंजनू हो जा। उसे भी मदर की काई परवाह न।

मां कौ पैर के नीचे जन्नत होवे सै। पर जाने क्यूं बड़े होकर लोग दोजख त्यार करने में लग जां।
जमाना घणा बुरा सै भारती! आदमी कू रिश्ते याद करने कौ खातर आज कैलेंडर अर अलार्म घड़ी कौ जरूरत पड़े सै, क्योंकि दिमाग अर दिल में डे तो है पर मदर कोन्या।

कैलेंडर, कैसेट अर कैमरा न हो ता यंगिस्तान कू या पता करना भारी पड़ जा, अक किसने उसे पैदा करने की गल्ती करी? परे कर यंगिस्तान कू आ चलकर किसी पेड़ के नीचे बैठे सूं। इब मोय भी मां बहुत याद आ री। जो करे बस देखता रहूं।
मन देखा चौधरी कौ आंख भर आई थी। तू जहां भी हो, ऐ मां तुझे सलाम!